Imyigire n’imyigishirize y’inshoza y’izina ntera mu mashuri yisumbuye

Abstract

Ubu bushakashatsi bwakozwe ku nsanganyamatsiko “Imyigire n‟imyigishirize y‟inshoza y‟izina ntera mu mashuri yisumbuye”, bwakozwe nyuma yo kubona inshoza zitandukanye zihabwa izina ntera mu Kinyarwanda zidatuma abanyeshuri baryumva neza. Ibitabo mfashanyigisho ndetse n‟iby‟ubushakashatsi ntibivuga inshoza imwe, kuko usanga byemeza inshoza zitandukanye z‟ubu bwoko bw‟ijambo. Izo nshoza ebyiri, ni ntera yafashe indomo, ndetse n‟izina rihurizwa ku izina rigaragiye n‟ikinyazina ngenera, rikarivugaho inkomoko, akarere, imimerere n‟imiterere cyangwa igikoresho kifashishijwe. Ubu bushakashatsi bwari bufite intego yo kugaragaza uburyo inshoza y‟izina ntera ivugwaho ndetse no kunoza imyigire n‟imyigishirize yaryo. Ku birebana n‟iyoboramikorere, ubu bushakashatsi bwifashishije uburyo nyamimerere ndetse na nyamubaro. Abakeshwamakuru batoranyijwe hashingiwe ku mpamvu, bahabwa ibibazo ndetse barabisubiza. Mu gukusanya amakuru ndetse hanasomwe ibitabo mfashanyigisho n‟iby‟ubushakashatsi bivuga ku kibonezamvugo k‟Ikinyarwanda, by‟umwihariko ku izina ntera. Mu gusesengura imbonwa, ubushakashatsi bwasanze izina ntera rizwi cyane ari ntera yafashe indomo, naho indi nshoza y‟izina ntera ntizwi, kandi na yo yigishwa mu mashuri. Ibi bikaba bigaragaza ko inshoza y‟izina ntera itumvikana neza mu mashuri yisumbuye. Inshoza yavuzwe mu bitabo by‟ubushakashatsi byifashishijwe mu gutegura ni yo itumvikana, bisobanura ko abateguye ibitabo mfashanyigisho batabashije kuyitsindagira ku buryo abanyeshuri bayifata. Ubushakashatsi rero bwatanze inshoza nshya ikubiyemo ibyavugwaga mu nshoza yahabwaga izina ntera ndetse n‟ingingo nshya, byose bikaba bituma inshoza y‟izina ntera irushaho kumvikana. Mu kwanzura, ubu bushakashatsi butanga inama ku nzego zishinzwe guteza imbere Ikinyarwanda, bugaragaza igikwiye gukorwa kugira ngo inshoza y‟izina ntera irusheho kumvikana.