Imbogamizi z’indimi shami mu bibazo umunyeshuri n’umwarimu bahura nabyo mu myigire n’imyigishirize y’ururimi rw’ikinyarwanda iyerekezo ry’ikirera mu mashuri yisumbuye mu karere ka Musanze

Abstract

Ubu bushakashatsi bufite insanganyamatsiko igira iti ―Imbogamizi z‘indimi shami mu bibazo umunyeshuri n‘umwarimu bahura nabyo mu myigire n‘Imyigishirize y‘Ikinyarwanda. Iyerekezo ry‘Ikirera mu amashuri yisumbuye mu Karere ka Musanze‖bwakozwe nyuma yo kubona ko hari imbogamizi mu myigire n‘imyigishirize y‘ururimi rw‘ Ikinyarwanda mu gace gakoreshwamo ururimi shamirw‘Ikirera nk‘ururimi kavukire bituma abanyeshuri batumva Ikinyarwanda ndetse ntibanagitsinde ku rugero rushimishije.Ubu bushakashatsi bwari bushingiye ku ntego eshatu zihariye ari zo izi zikurikira: Kwerekana imbogamizi abarimu n‘abanyeshuri bahura nazo mu kwiga isomo ry‘Ikinyarwanda mu gace kavugwamo Ikirera nk‘ururimi shami,Kugaragaza ingaruka ziterwa no kuvanga ururimi shami n‘ururimimbonera mu ishuri,gushaka uburyo bwakoreshwa kugira ngo abanyeshuri n‘abarimu be kuvanga ururimi shami n‘Ikinyarwanda ururimi mbonera igihe biga kandi n‘ururimi mbonerarugakomeza gusigasirwa.Ubu bushakashatsi bwakorewe ku barimu n‘abanyeshuri bo mu bigo bibiri GS BUSOGO I na GS BYANGABO bo mu mashuri yisumbuye .Ihange nyamiterere rya Naom Chomsky niryo ryayoboye ubu bushakashatsi.Nk‘uko n‘igice k‘iyoboramikorere kitaweho ubu bushakashatsi bwakoresheje uburyo nyamimerere n‘uburyo nyamibare.Mu gushaka itsinda nkeshwamakuru hifashishijwe itoranya rishingiye ku gipimo umuntu ashobora kwibeshyaho. Ubu bushakashatsi kandi bwakoresheje ibibazo byanditse ku barimu n‘abanyeshuri n‘ibibazo by‘iganirabaza ku barimu. Mu gukusanya amakuru ubu bushakashatsi bwibanze cyane ku kubaha igihe n‘ubuzima bwite by‘abakeshwamakuru. Abakeshwamakuru bitabiriye ubushakashatsi ku bushake bwabo. Nyuma yo gukusanya amakuru hakurikiyeho kuyamurika no kuyasesengura, ubu bushakashatsi bwifashishije inkoranabuhanga izobereye mu gusesengura amakuru nyamubano na nyamubaro(SPSS). Ubu bushakashatsi bwabonye ko imbogamizi abarimu n‘abanyeshuri bahura na zo ziterwa n‘ibangikana ry‘ururimi shami rw‘Ikirera n‘Ikinyarwanda ururimi mbonera zirimo kutagira ururimi umenya neza, kwica amategeko y‘ikibonezamvugo, imyandikire itanoze, imivugirwe itaboneye n‘ikibazo cy‘ubwumvane biturutse ku magambo Ikirera gifite atari mu Kinyarwanda. Ingaruka ziterwa no kubangikanya ururimi shami n‘ururimi mbonera habaho kutigirira ikizere mu kuvuga Ikinyarwanda, gutakaza umwimerere w‘ururimi mbonera, kutagira ururimi umenya neza kutamenya kwandika no gusoma. Mu kwanzura ubu bushakashatsi bwatanze inama ku babyeyi ko bajya bafasha abana nk‘uko byagaragaye mu bushakashatsi butandukanye ko icyo bigishije abana bagifata kandi ko ari bo barimu ba mbere, bwagiriye inama kandi abafite mu nshingano integanyanyigisho kugira amabwiriza n‘ibindi bikorwa bashyiraho mu rwego rwo gufasha abanyeshuri n‘abarimu baherereye mu gace gakoreshwamo indimi shami.