Uruhare rw’imyigire n’imyigishirize y’amazina y’inka mu gusigasira indangagaciro z’umuco nyarwanda mu mashuri yisumbuye yigisha ikinyarwanda nk’isomo ry’ingenzi: Urugero rw’amashuri yo mu karere ka Gatsibo

Abstract

Ubushakashatsi Uruhare rw’imyigire n’imyigishirize y’amazina y’inka mu gusigasira indangagaciro z’umuco nyarwanda mu mashuri yisumbuye yigisha isomo ry’Ikinyarwanda nk’isomo ry’ingenzi bwakorewe mu Karere ka Gatsibo, mu bigo bitatu ari byo: GS Akabuga, GS Rubona na TTC Kabarore. Ubu bushakashatsi bugamije kugaragaza indangagaciro zikubiye mu mazina y‟inka yigishwa mu kiciro cya kabiri cy‟amashuri yisumbuye yigisha Ikinyarwanda nk‟isomo ry‟ingenzi, kwerekana uburyo indangagaciro z‟umuco zikubiye mu mazina y‟inka zigishwa muri icyo kiciro, no kugaragaza impamvu indangagaciro zikubiye mu mazina y‟inka zigishwa uko zigishwa. Tukaba twarahisemo gukoresha uburyo nyamimerere cyangwa nsesengurabitekerezo. Twahisemo itsinda nkeshwamakuru rishingiye ku mpamvu, tugamije kumenya byimbitse ibijyanye n‟iryo tsinda nyirizina. Iryo tsinda rigizwe n‟abarimu batatu bigisha isomo ry‟Ikinyarwanda n‟amatsinda atatu agizwe n‟abanyeshuri hagati ya batanu na batandatu, bo mu bigo GS Akabuga, GS Rubona na TTC Kabarore, mu Karere ka Gatsibo. Dukusanya amakuru, twakoresheje uburyo bw‟ibaza rishingiye ku rutonde rw‟ibibazo, isesenguranyandiko ndetse n‟iganiriza rifunguye. Mu gusesengura amakuru, twagendeye ku ihange mbandankomoko na nyamujora. Twegeranyije ibisubizo bisa n‟ibijya gusa tumenya umubare w‟ababitanze n‟inshuro byagiye bigaruka. Hashingiwe ku bisubizo byatanzwe, hagaragaye ko koko mu mazina y‟inka harimo indangagaciro z‟umuco nyarwanda. Ibi kandi bikaba bishimangirwa no mu byavuye mu kiganiro n‟abarimu bigisha Ikinyarwanda kuri ibyo bigo byakoreweho ubushakashatsi. Ibyavuye mu bushakashatsi byagaragaje ko iyo abarimu bigisha bahera ku kwerekana ishusho y‟inka iri mu gitabo, hanyuma hagasomwa izina ry‟inka runaka, bakarisesengura, bakabara utubeshuro, bakavuga indangagaciro z‟umuco zirimo, nyuma bafatanyije n‟abanyeshuri bagasubiza ibibazo byo kumva umwandiko. Indangagaciro zigwa binyuze mu mazina y‟inka ni ukugira ubupfura, ubutwari ndetse n‟umurava, ariko zikigishwa baterekana amabango yo mu izina ry‟inka zigaragaramo. Impamvu abarimu bakoresha uburyo bwo kwigisha bwagaragaye ni uko bufasha abanyeshuri gucengerwa n‟ibyo bagiye kwiga ngo baze gukurikira, ndetse bafatanye n‟umwarimu gusubiza ibibazo byo kumva umwandiko kugira ngo barusheho kubisobanukirwa. Indi mpamvu ni uko ari bwo buryo buri mu bitabo mfashanyigisho bakoresha. Twasoza tuvuga ko amahange twakoresheje dusesengura yatugejeje ku kubona ko imyigishirize y‟amazina y‟inka yanozwa n‟abo bireba, maze mu gusesengura izina ry‟inka hagashakwamo koko n‟indangagaciro z‟umuco nyarwanda.