Gutoza indangagaciro mu mashuri yisumbuye hifashishijwe insigamigani. urugero rw’amashuri yisumbuye yo mu karere ka Gasabo – imirenge ya Kinyinya na Bumbogo.

Abstract

Ubu bushakashatsi bwakozwe hagamijwe kugaragaza akamaro ko gutoza indangagaciro mu mashuri yisumbuye hifashishijwe insigamigani. Intego zihariye z’ubu bushakashatsi ni ugusesengura insigamigani zigishwa mu mashuri yisumbuye n’indangagaciro zikubiyemo, kwerekana uruhare rwo kwifashisha insigamigani mu gutoza indangagaciro abanyeshuri bo mu mashuri yisumbuye ndetse no kugaragaza imbogamizi abarimu bagira mu kwigisha insigamigani n’uburyo zakemuka. Abakoreweho ubushakashatsi, ni abarimu mirongo itatu na batandatu bigisha Ikinyarwanda mu mashuri yisumbuye, bo mu Mirenge ya Kinyinya na Bumbogo. Batoranyijwe hifashishijwe uburyo bwo guhitamo bushingiye ku mpamvu. Hakoreshejwe uburyo nyamimerere mu gusesengura amakuru yavanywe mu nyandiko zitandukanye zifashishwa mu myigire n’imyigishirize mu mashuri yisumbuye, n’ayavuye mu iganirabaza. Amakuru yavuye muri ubu bushakashatsi agaragaza ko mu mashuri yisumbuye higishwamo insigamigani, kandi izo nsigamigani zikaba zirimo indangagaciro nyinshi zafasha urubyiruko ruri mu mashuri yisumbuye gukura baharanira kuba abanyagihugu bazima. Ubu bushakashatsi kandi bugaragaza uburyo abarimu basanzwe bigishamo insigamigani, maze bugaragaza ubundi buryo abarimu bo mu mashuri yisumbuye bakwifashisha, kugira ngo indangagaciro zikubiyemo zirusheho gutezwa imbere mu mashuri yisumbuye, binyuze mu nsigamigani. Insigamigani ni imwe mu ngeri z’ubuvanganzo nyarwanda. Zishobora kugira akamaro gakomeye mu gutoza umuco w’igihugu. Binyuze mu kuziganira, kuzisoma no gusesengura neza imyitwarire y’abanyarubuga, abanyeshuri bungukiramo indangagaciro zitandukanye ari na ko bazihuza n’ubuzima bwabo bwa buri munsi. Bugaragaza kandi zimwe mu mbogamizi abarimu b’ Ikinyarwanda bahura na zo mu kwigisha indangagaciro bifashishije insigamigani, harimo kuba insigamigani ziri mu bitabo byifashishwa zidahagije ariko butanga n’ ingamba ndetse n’ibyifuzo byafasha, kugira ngo indangagaciro zikubiye mu nsigamigani zirusheho gutezwa imbere mu mashuri yisumbuye